የኢትዮጵያ ገቢዎችና ጉምሩክ ባለሥልጣን የቀድሞው ከፍተኛ ባለሥልጣናቱ በሙስና ወንጀል ተጠርጥረው በፌዴራል የሥነ ምግባርና የፀረ ሙና ኮሚሽን ዐቃቤ ሕግ ክስ ከተመሰረተባቸው በኋላ ባለፉት ወራት በሰራተኞቹ ላይ ግምገማ ያካሄደ ሲሆን በዚህም ከተገመገሙት 8ሺ ሰራተኞች ውስጥ ስምንቱን አባሯል። በዚሁ ዙሪያ ማብራሪያ የሰጡት አዲሱ የባለሥልጣን መስሪያቤቱ ዋና ዳይሬክተር አቶ በከር ሻሌ ስምንት ሺ ሰራተኞች ተገምግመው ስምንቱ ከስራ መባረራቸው ችግሩ በዚያው ልክ ብቻ ነበር አለማለት መሆኑን ገልፀዋል። የፌዴራል የሥነምግብርና ፀረ ሙስና ኮሚሽን በባለሥልጣን መስሪያቤቱ ከፍተኛ የስራ ኃላፊዎች ላይ እርምጃ ከወሰደ በኋላ በሰራተኞች በኩል ከፍተኛ መደናገጥ ተፈጥሮ የነበረ መሆኑን ያመለክቱት ዋና ዳይሬክተሩ፤ ከሁሉም በፊት ሰራተኛውን የማረጋጋት ስራ ከተሰራ በኋላ ከሰራተኛው ጋር የንቅናቄ መድረክ ተፈጥሮ በችግሩና በመፍትሄው ዙሪያ ውይይት ሲደረግ የቆየ መሆኑን አመልክተዋል።

ከግምገማው በኋላ በመድረክ ላይ በሰራተኞች ላይ በቀረበ ግምገማ ብቻ ሳይሆን ባጠፉት ጥፋት ተመርምሮ ትክክለኛ መረጃ በተገኘባቸው ሰራተኞች ላይ ብቻ የማባረሩ እርምጃ ተወስዷል ብለዋል። ስምንቱ ሰራተኞች በአፋጣኝ ከስራ ይሰናበቱ እንጂ ሌሎች በመቶዎች በሚቆሩ ሰራተኞች ላይም ታዩባቸው በተባሉ ግድፈቶች ላይ የማጣራቱ ሥራ እየተካሄደ መሆኑን አቶ በከር አስታውቀዋል። ማጣራቱ ተጠናቆ ጥፋተኛ ሆነው ከተገኙም አስተዳደራዊ ቅጣትም የሚጣልባቸውም ይኖራሉ ብለዋል። ጥፋተኛ ሰራተኛን በሙሉ በማባረር መፍትሄ ማምጣት አይቻልም ያሉት ዋና ዳይሬክተሩ፤ መፍትሄው ሰራተኞቹ ትክክለኛ አመለካከትን እንዲይዙ ግንዛቤ ማስጨበጥ ነው ብለዋል።

ገቢዎችና ጉምሩክ ባለሥልጣን ከሐምሌ ወር 2005 ጀምሮ ባካሄደው ግምገማ በተገኘው የግምገማ ውጤት በመስሪያቤቱ ያለው የኪራይ ሰብሳቢነት ባህሪና አመለካከት ስር የሰደደ መሆኑን ያረጋገጠ ሲሆን ችግሩን በአንድ ጀምበር የማይለወጥ መሆኑ ግንዛቤ መውሰዱን አመልክቷል።