Zerihun Tesfaye
ያለፉት ሦስት ቀናት ፌስቡክ አሳፋሪ ክስተት የታየበት፣ የዘረኝነት ስካር ናላቸውን ያዞረው አዳጊዎች የሕወሓት ባለስልጣናትን በአንቀልባ ካላዘልን ብለው የጮሁበት መድረክ ሆኖ ነበር። ድርጊቱ አዲስ ባይሆንም የአንድ ባለስልጣን ‘ክብር’ ተናካ ብለው ጉዳዩን ከብዙሃን ጋር ለማያያዝ መሞከራቸው የዛሬ የሕወሓት አጫፋሪዎች ነገ ምን ሊፈጥሩ እንደሚችሉ አመልካች ነውና በጉዳዩ ላይ የራሴን አስተያየት ለመስጠት ተገድጃለሁ።
የነገሩ መነሾ፤ የዞን ዘጠኝ ባልደረባ የሆነው ጆማኔክስ ከዶ/ር ቴዎድሮስ አድሃኖም ጋር በትዊተር ገጽ ያደረገውን ምልልስ ተከትሎ የተፈጠረ ነው። የጆማኔክስ “ስድብ” ቀጥታ ከባለስልጣኑ ጋር ያደረገውና ባለጉዳዩም መብት ረጋጭ ዓይነት ባይሆኑ ኖሮ መልስ የሚሰጡበት ጉዳዩም እዛው ገጽ …ላይ የሚጠናቀቅ በሆነ ነበር። ይሁንና ነገርን እንዳሻቸው የሚቀለብሱት ካድሬዎች የሁለቱን ምልልስ ከአጠቃላይ የትግራይ ሕዝብ ጋር በማያይዝ ያዙኝ ልቀቁኝ ነበር የመረጡት።
ጥላቻን መርጨት ዋነኛ መተዳደሪያቸው ያደረጉት ግለሰቦች ስድቡ የትግራይ ሕዝብን እንጂ ቴዎድሮስ ላይ ያነጣጠረ ብቻ አይደለም ወደሚል መደምደሚያ ሊያደርሳቸው የሚችል አንዳችም መንገድ አልነበረም። ምክንያቱም አንደኛ፤ የትግራይ ሕዝብ በስም አንዳችም በምልልሱ ላይ ስላልተጠቀሰ ሁለተኛ፤ ባለስልጣናትን መስደብ ሕዝብን መስደብ ነው የሚል ትርጓሜ ስለሌለ። ( ቢኖርም እንኳ ሰውየው የኢትዮጵያ እንጂ የትግራይ ባለስልጣን የሚል ቅጥያ ስለሌላቸው። ሕዝብ ተሰደበ ከተባለም የኢትዮጵያ ሕዝብን ሁሉ የሚመለከት ስለሚሆን) ሦስተኛ፤ ስድብ የተባለው ቃል ከስድብነት ይልቅ አጠቃላይ የኢኮኖሚ ስታተስን የሚገልጽ በመሆኑ። ይህም ከአንድ ቡድን ወይም የአንድ አካባቢ ተወላጅ ይልቅ በታሪኩ ውስጥ ያለፈን ግለሰብን የሚመለከት በመሆኑ
እውነታው ይህ ቢሆንም ካድሬዎቹ እንደተለመወደው የዘር ከበሯቸውን አንስተው ማጮህን ነበር የመረጡት። የትግራይን ሕዝብ በአንድ ቁና ሰፍረው ማደናገርን፤ ያልተሰጠውን ስያሜ በመስጠት ከተቃዋሚዎችም ከተቀረው ሕዝብ ጋርም ማቃቃርን የስልጣን ማራዘሚያ ዋነኛ መንገድ አድርገውታል። በዘጠና ሰባት ምርጫ ግንቦት ሰባትን፤ ከዛም እነ እስክንድር ነጋ ላይ አሁን ደግሞ የዞን ላይን ልጆች ላይ ተመሳሳይ የዘር ጉዳይ መነሳቱ የጥላቻ ፖለቲካ የሥርዓቱ ዋነኛ መርሕ መሆኑን ቁልጭ አድርጎ የሚያሳይ ነው።
ከሁሉ የከፋው ጉዳይ ግን በተመሳሳይ መልክዓ-ምድር የሚኖረው ማህበረሰብ ከሚጋራቸው ከቋንቋ እና ባህል ጉዳዮች ውጭ እንደ ግለሰብ የራሱ የሆነ የፖለቲካ አመለካከት፤ የነገሮች አተያይ ወይም አጠቃላይ የሕይወት ፍልስፍና የሌለው ይመስል ሕወሓት በሰፋለት ጥብቆ እንዲታፈን መገደዱ ነው። ሰዳቢውም ተሰድባሃል ብሎ ጠበቃ የሚቆመውም ሕወሓት መሆኑ ደግሞ ይበልጥ አሳዛኝ ነው