Print
Email
0
0
ኢምባሲውን የመውረር ስክሪፕት ጸሀፊዎች አነማን ይሆኑ?
=~=~=~=~=~=~=~=~=~=~=~=~=~=~=~=
ይህ ጉዳይ ተቃውሞ ሊባል የሚችልበትን ልክ ያለፈ ይመስለኛል።ከልክ ያለፈ የተራ ወሮበላ ስራ እየሆነ ነው። የዩስ አሜሪካ መንግስት በሀገሩ የሚገኙ የማንኛውም ሀገር ኢምባሲና ዲፕሎማቲክ ሰራተኞች ጸጥታና ደህንነት የመጠበቅ ኃላፊነት አለበት። ይህ ሀላፊነት የሚነሳው በ፲፱፷፩ የቪየና ዲፕሎማቲክ ግንኙነቶች ኮንቬንሽን አንቀጽ ፳፪ መሰረት የተቀባይ ሀገር ኃላፊነት በመሆኑ ነው።
ኮንቬንሽኑ በተጨማሪም የአንድ ኢምባሲ ግቢ የማይደፈር እንደሆነ ይደነግጋል። የአሜሪካ መንግስት የጸጥታ ሀይሎች በተደጋጋሚ ይህን ሀላፊነታቸውን መውጣት አልቻሉም። የኢትዮጵያ መንግስት ባለስልጣናትም ለዲፕሎማቲክ ተልዕኮ ሰራተኞቻቸውና ባለስልጣኖቻቸው ደህንነትን የሚመለከት ሀላፊነታቸውን ሊወጡ ይገባል።
ልጅ እያለሁ(ከ፲-፲፪) ያነበብሁት ትርጉም ልብወለድ መጽሀፍ ትዝ ይለኛል። ታሪኩ ስለ አንድ የመገናኛ ብዙሀን (ፕሬስ) ነው። ፕሬሱ ከአሸባሪዎች ጋር ግንኙነት አለው። ፋይናንስ ያደርጋቸዋልም። እናም ወደ ማተሚያ በሚገባበት ሰዓት ሁልጊዜም ሰበር ዜናዎች አሉት። ብዙ ጊዜም የዜናው ዝርዝር አስቀድሞ ነው የሚጻፈው።
የተፈለገው ቦምብ በማድሪድ በፓሪስ ወይም በጣሊያን ከተሞችና በኒዮርክ ሲከናወን ጥዋት ላይ የሚዘግበው ያ ጋዜጣ ብቻ ነው። በመሆኑም ሰበር ዜና ብቻ ሳይሆን ዝርዝሩም በደንብ የሚወርድ ታሪክ አለው። ዲሲም ይህ የዜና ስራ ከዲሲዎቹ የመገናኛ ብዙሀን ጋር በቅንጅት የሚሰራ ይመስላል። የብዙሃን መገናኛ ታማኝነትን ለማግኘት የሚፈበረኩትና የሚተወኑት ሰበር ዜናዎች ቅጥ እያጡ ነው።
በደንብ በተደራጀ ጥቂት ወሮ በሎች የአንድ ኢምባሲ ግቢ ወይም የግለሰብን ንብረትና የክብር አጥርን ያለህግ እየደረመሱ ይገቡና ዜና አንባቢዎቹና ጸሀፊዎቹ ሰበር ዜና ለማብሰር የሚርዋሩዋጡበትን ሁኔታ እየታዘብን ነው።
ስለዚህም ይህች የዜና እሽቅድድም በመገናኛ አውታሮቹ ስምሪት የሚሰጠው ቡድን ለዜና አደን እንደወጣ ጠቋሚ ነው።እነዚህ ግለሰቦች አጥር ጥሰው የሚገቡበትን ተውኔት የሚጽፉትና የአርታዒነት ሚናውን የሚጫወቱት በኢሳት ስቱዲዮዎች ያሉ ወይም እስከዚያ የረዘሙ እጆች ቢሆኑ አያስደንቀኝም።
የሆነ ሆኖ ይህ መንገድ በህግም በሞራልም የሚያዋጣ አይመስለኝም። ተቃውሞም የራስን ኃላፊነት በተገነዘበ መንገድ መከናወን አለበት። መለኪያችን ምንም ይሁን ምን እስካሁን ለተከናወኑት ችግሮች ተጠያቂ አልተደረግንም በሚል በወንጀል ላይ ወንጀል ባይደራረብ ይጠቅማል። በዚያውም የኢሳት የጭንቅላት ጓዳም እየተበረበረ ነው። ወደ ጤናቸው ይመልሳቸው ዘንድ እንጸልያለን።
Average Rating