Print
Email
0
0
ምንጭ ኢትዮጵያ ዛሬ
ኢዛ (እሁድ ግንቦት ፳፯ ቀን ፳፻፱ ዓ.ም. June 4, 2017)፦ ቅዳሜ ከምሽቱ አራት ሰዓት በኋላ፣ በሎንዶን እምብርት በሚገኘው የሎንዶን ድልድይ አካባቢ ሦስት ጀሃዲስት አሸባሪዎች ሰባት ሰዎችን ገድለው አርባ ስምንት ሰዎችን ካቆሰሉ በኋላ፣ በእንግሊዝ ታጣቂ ፖሊሶች ተገደሉ።
እነዚህ ሦስት አሸባሪዎች ነጭ ቫን መኪና (ከኋላው መስታወት አልባ መለስተኛ አውቶቡስ፣ ዕቃ መጫኛ ሚኒባስ) ሎንደን ድልድይ አካባቢ ከምሽቱ አራት ሰዓት በኋላ መንገደኞች ላይ እየነዱ ጉዳት ካደረሱ በኃላ፣ ”ብራውት ገበያ” ሲደርሱ ከመኪናው በመውጣት አስራ ሁለት ኢንች በሚሆኑ ጩቤዎች በአካባቢው የነበሩ በርካታ ሰዎችን ወግተዋል።
በወቅቱ በሥራ ላይ የነበረና የተጎዱ ሰዎችን በመርዳት ላይ የነበረ የእንግሊዝ ፖሊስ ባልደረባ በጩቤ ከተጎዱት መሃል ሲሆን፣ ጉዳቱ ለሕይወቱ እንደማያሰጋው ታውቋል።
ሦስቱ አሸባሪዎች በራሳቸው ላይ ቦንብ የሚመስል ታጥቀው የነበሩ ቢሆንም፣ ቦምቡ የውሸት (አርቲፊሺያል) እንደነበር የእንግሊዝ ፖሊስ ገልጧል።
በያዝነው የአውሮፓውያን ዓመት (፳፻፲፯) ውስጥ ይኽኛው በእንግሊዝ ላይ የተፈጸመው የአሸባሪዎች ጥቃት ሦስተኛው እንደሆነ ይታወቃል። የመጀመሪያ ጥቃት ባለፈው ማርች ፳፪ በሎንዶን ዌስትሚንስትር የደረሰው ሲሆን፣ ሁለተኛ ደግሞ ሜይ ፳፪ የተፈጸመው የማንቸስተሩ የቦምብ ጥቃት መሆናቸው አይዘነጋም።
Average Rating