Print
Email
0
0
23 December 2018ታምሩ ጽጌ
በኢትዮጵያ ብሮድካስቲንግ ኮርፖሬሽን (ኢቢሲ) የተለያዩ መዝናኛ ዝግጅቶች አስተዋዋቂ የነበረችው ወ/ሮ ፍፁም የሺጥላ፣ ከሜቴክ ጋር በተያያዘ ተጠርጥራ ከታሰረችበት የሙስና ወንጀል በ50 ሺሕ ብር ዋስ ከእስር እንድትፈታ ፍርድ ቤት ፈቀደ፡፡
የፌዴራል ፖሊስ ወንጀል ምርመራ ቡድን ከአንድ ወር በፊት ከሜቴክ ከፍተኛ ኃላፊዎች ጋር በመመሳጠር፣ የኮርፖሬሽኑ ሠራተኛ ሳትሆን እንደሆነች በማስመሰልና የድጋፍ ደብዳቤ በማጻፍ ወደ አሜሪካ መሄዷን ለፍርድ ቤቱ ማስረዳቱ ይታወሳል፡፡ አሜሪካ ለቆየችባቸው 30 ቀናት 11,500 ዶላር አበል እንደተከፈላትም በመግለጽ መርማሪ ቡድኑ ሲከራከር ቆይቷል፡፡ በተጨማሪም ፍፁም ኢንተርቴይመንት ለሚባለው ድርጅቷም በስፖንሰር መልክ 954,770 ብር እንደተከፈላት፣ ይኼም የሆነው ከሜቴክ ኃላፊዎች ጋር በነበራት የጥቅም ግንኙነት መሆኑንም መርማሪ ቡድኑ ለፍርድ ቤቱ ሲያስረዳ ቆይቷል፡፡
መርማሪ ቡድኑ በወ/ሮ ፍፁም ላይ ተጨማሪ ምርመራ ለማድረግ ታኅሳስ 5 ቀን 2011 ዓ.ም. የሰባት ቀናት ተጨማሪ ጊዜ ተሰጥቶት የነበረ ሲሆን፣ በተሰጠው ጊዜ የሠራውን ምርመራ ታኅሳስ 12 ቀን 2011 ዓ.ም. ለፌዴራል ከፍተኛ ፍርድ ቤት አሥረኛ ወንጀል ችሎት አስረድቷል፡፡
መርማሪ ቡድኑ እንደገለጸው፣ ተጠርጣሪዋ 450 ሺሕ ብር ከሜቴክ መቀበሏን የሚያሳይ አዲስ ሰነድ ማግኘቱን በማስረዳት፣ ተጨማሪ ማስረጃዎችን ለመሰብሰብና ኦዲት ለማሠራት ተጨማሪ የምርመራ ጊዜ ጠይቆ ነበር፡፡
የተጠርጣሪዋ ተከላካይ ጠበቆች ባቀረቡት ተቃውሞ 450 ሺሕ ብር በስፖንሰር አግኝታለች ከተባለው 954,770 ብር ጋር የተካተተ መሆኑን አስረድተዋል፡፡ ኦዲትን በሚመለከት ባቀረቡት ተቃውሞ የሜቴክ ኦዲት እስከሚሠራ ድረስ ብዙ ቀናት ስለሚወስድ፣ የእሷ ተለይቶ እንዲሠራና ይኼም ቢሆን እሷ በዋስ ሆኖ መሠራት የሚችል በመሆኑ የዋስትና መብቷ እንዲከበርላት ጠይቀዋል፡፡
ፍርድ ቤቱ የምርመራ መዝገቡን ተቀብሎ ሲመለከተው 450 ሺሕ ብር የተባለው ቀደም ብሎ ከተጠቀሰው 954,770 ብር ውስጥ የተካተተ መሆኑን በማረጋጡ፣ የመርማሪ ቡድኑን ጥያቄ ውድቅ በማድረግ ወ/ሮ ፍፁም በ50 ሺሕ ብር ዋስ ከእስር እንድትፈታ ትዕዛዝ ሰጥቷል፡፡ መርማሪ ቡድኑ ይግባኝ እንደሚል ቢገልጽም፣ አቤቱታውን በጽሑፍ እንዲያቀርብ ተነግሮታል፡፡
Average Rating