Print
Email
0
0
አሁን በአገሪቱ እየተከናወነ ያለው የለውጥ እንቅስቃሴ ምንም እንኳን ጥልቅ፣ ሰፊና ትልቅ ተስፋን ይዞ የመጣ ቢሆንም በተቃራኒው ሥጋቶች እንዳሉበት ‹‹ሕዝባዊ መሠረት የሌላቸው ፀረ ለውጥ አስተሳሰቦች በተቀናጀ መንገድ እየተመሩ ተግዳሮት ሆነውበታል፤›› ሲል፣ የኢሕአዴግ ሥራ አስፈጻሚ ኮሚቴ መገምገሙን የግንባሩ ምክር ቤት ጽሕፈት ቤት አስታወቀ፡፡
የግንባሩ ሊቀመንበር ዓብይ አህመድ (ዶ/ር) ከተመረጡ ወዲህ ሁለተኛ ስብሰባውን ያደረገው የኢሕአዴግ ሥራ አስፈጻሚ ኮሚቴ፣ ከጥር 7 ቀን እስከ ዓርብ ጥር 10 ቀን 2011 ዓ.ም. ድረስ በአገራዊ ለውጥና ያሉበት ተግዳሮቶች ላይ በሊቀመንበሩ ለስብሰባው የተዘጋጀ ጽሑፍ መሠረት በማድረግ ተወያይቷል፡፡
‹‹ከለውጡ በተቃራኒ ያሉ ኃይሎች ሕዝቡን ለማደናገርና ድጋፍ ለማግኘት እንዲያመቸው ለውጡን ተከትሎ በሕዝቡ ውስጥ ያሉ ብዥታዎችንና በለውጡ ወቅት ሊያጋጥሙ የሚችሉ የአመራር ግድፈቶችን፣ እንዲሁም ማንነትንና ሌሎች አጀንዳዎችን ምክንያት በማድረግ ጽንፈኛ አካሄድ በመከተል የራሳቸውን ፍላጎት ለማስፈጸም ሲሉ በዜጎች ሕይወት፣ አካልና ንብረት ላይ ጉዳት እንዲደርስና ዜጎች ከመኖሪያቸው እንዲፈናቀሉ እየሠሩ እንዳሉ ታይቷል፡፡ የለውጡ አደናቃፊ ኃይሎች በሕገወጥ የመሣሪያ ዝውውር በመታገዝ ግጭትና መፈናቀል እንዲፈጠር፣ ኮንትሮባንድና ሕገወጥ የገንዘብ ዝውውርን በመሳሰሉ የኢኮኖሚ አሻጥሮች በመሳተፍ ለውጡን ለመግታት እየተረባረቡ እንደሚገኙ ገምግሟል፤›› ሲል የኢሕአዴግ ምክር ቤት ጽሕፈት ቤት ባወጣው መግለጫ አስታውቋል፡፡
ከዚህ በተጨማሪም ግንባሩ በራሱ ውስጥ በለውጡ ምንነት፣ በለውጡ ውስጥ በሚኖር ሚናና የወደፊት አቅጣጫ ላይ አንድነት ኖሮት እየተጓዘ በመሆኑ በአባል ፓርቲዎች መካከል የአካሄድ ግድፈቶች መኖራቸውና የእርስ በርስ መጠራጠሮች የውይይቱ አጀንዳ ነበሩ፡፡
ሆኖም የኢሕአዴግ ሥራ አስፈጻሚ ኮሚቴ ያወጣው መግለጫ ካሁን በፊት ሲደጋገሙ የነበሩ ሐሳቦች ላይ ያተኮረና አዲስ ነገር ይዞ መምጣት የተሳነው እንደሆነ የሚተቹ አሉ፡፡ ይኼንን በተመለከተ ሪፖርተር ያነጋገራቸው የስብሰባው ተካፋይ የነበሩ የሥራ አስፈጻሚ ኮሚቴ አባል ይኼኛውን ስብሰባ ለየት የሚያደርገው አገሪቱ አሳሳቢ ሥጋት እንደተደቀነባትና ልትበታተን ትችላለች የሚል አስተሳሰብ ተይዞና ታምኖበት የተደረገ መሆኑን በመግለጽ፣ በሊቀመንበሩ የተዘጋጀው ጽሑፍም ይኼንኑ እንደሚያስረዳ ተናግረዋል፡፡ ‹‹ሁሉንም ነገር በውጫዊ አካል እያሳሰብን አገር ልንበትን ነው›› መባሉንም አክለዋል፡፡
ምክር ቤቱ ባወጣው መግለጫ ኢሕአዴግን እንደ ፓርቲ ማጠናከር የውይይቱ አጀንዳ እንደነበርም አውስቶ፣ ‹‹ከዚህ በፊት ይስተዋሉ የነበሩ ሌብነትና የሰብዓዊ መብት ጥሰቶች ፈጽሞ እንዳይደገሙ በቂ ክትትል ማድረግና ለዚህ መነሻ ሊሆኑ የሚችሉ ዝንባሌዎችን በሁሉም የሥራ መስክ እየፈተሹ መጓዝ እንደሚገባ አቅጣጫ ተቀምጧል፤›› ብሏል፡፡
በአገሪቱ ከአሁን ቀደም የተፈጠሩ ችግሮችን በሕወሓት ማላከክን በጋራ ለመመከት ስምምነት ላይ መድረሳቸውን ለሪፖርተር የገለጹት የስብሰባው ተሳታፊም፣ ‹‹ከአሁን በፊት ላጠፋነው ጥፋትም ልማትም በጋራ ኃላፊነት ለመውሰድ ተግባብተን ወጥተናልም፤›› ሲሉ ገልጸዋል፡፡
Average Rating