Print
Email
0
0
በየካ ክፍለ ከተማ ሥር የሚገኘው የአዲስ አበባ ከተማ አስተዳደር ገቢዎች ቅርንጫፍ ጽሕፈት ቤት፣ ቀድሞ በዓመት አምስት ሚሊዮን ብር እየከፈለበት ካለው ሕንፃ በመልቀቅ በዓመት 18 ሚሊዮን ብር ወደሚከፈልበት ሕንፃ ለመዘዋወር የኪራይ ውል መፈጸሙ ጥያቄ ተነሳበት፡፡
ስማቸው እንዲጠቀስ ያልፈለጉ የቢሮው ሠራተኞች ለሪፖርተር እንደገለጹት፣ 22 ተብሎ በሚጠራው አካባቢ ከኢትዮጵያ ቱሪስት ንግድ ሥራ ፊት ለፊት የሚገኘው የየካ ክፍለ ከተማ የአነስተኛ ግብር ከፋዮች ጽሕፈት ቤት አዲስ ሕንፃ ተከራይቷል፡፡ በተጋነነ ዋጋ መገናኛ አካባቢ ግንባታው ወዳልተጠናቀቀ አዲስ ሕንፃ፣ ከየካቲት 1 ቀን 2011 ዓ.ም. ጀምሮ ለመዘዋወር ውል መግባቱን ገልጸዋል፡፡ ሠራተኞቹ እንደገለጹት ወደ አዲሱ ሕንፃ ለመዘዋወር ስምምነት ቢፈጽምም፣ የሕንፃው ግንባታ ባለመጠናቀቁ በዕለቱ ሊዘዋወር አልቻለም ብለዋል፡፡ ይህ ደግሞ ቅርንጫፍ ጽሕፈት ቤቱን በነባሩ ሕንፃ ለአንድ ወር እንዲቆይና ተጨማሪ ወጪ እንዲያወጣ አድርጎታል ብለዋል፡፡
ምንም እንኳ ጽሕፈት ቤቱ የየካ ግብር ከፋዮች የሚስተናግዱበት ቢሆንም፣ ሕንፃው የሚገኘው በቦሌ ክፍለ ከተማ በመሆኑ ወደ ራሱ ክፍለ ከተማ እንዲዘዋወር ከቦሌ ክፍለ ከተማ ግፊት እንደነበረበት ተጠቅሷል፡፡
ከዋጋ ግነቱ በተጨማሪ በአንድ ጊዜ በርካታ ቁጥር ያላቸውን ተሽከርካሪዎች ማስተናገድ ከሚችል ሥፍራ፣ ለምን ወደ አነስተኛ የመኪና ማቆሚያ ሥፍራ ወዳለው ሕንፃ ማዘዋወር አስፈለገ የሚል ጥያቄም አስነስቷል፡፡
የጽሕፈት ቤቱን አዲስ ሕንፃ ኪራይ በተመለከተ ውል መፈረሙን ለሪፖርተር ያረጋገጡት የክፍለ ከተማው ገቢዎች ጽሕፈት ቤት የኮሙዩኒኬሽን ባለሙያ አቶ አዳነ ገብረ እግዚአብሔር፣ የኪራይ ስምምነቱ በአስተዳደሩ የፋይናንስ ቢሮ ዕውቅና መሠረት መከናወኑን ገልጸዋል፡፡
ነገር ግን ቅርንጫፍ ጽሕፈት ቤቱን ማዘዋወር ያስፈለገበት ምክንያት ነባሩ ሕንፃ ለቢሮ ሠራተኞች ጠባብ ከመሆኑም በላይ፣ ለግብር ከፋዮችም አመቺ ባለመሆኑ ነው ብለዋል፡፡ ‹‹ዞሮ ዞሮ ለተገልጋዮች የተሻለ አገልግሎት ለመስጠት ሲባል ነው፤›› ያሉት አቶ አዳነ፣ ‹‹ግብር ከፋዮቻችን የየካ ክፍለ ከተማ ነዋሪዎች በመሆናቸው ብዙ ሳይርቅ በራሳቸው ክፍለ ከተማ አገልግሎት እንዲያገኙ ለማስቻል ነው፤›› ሲሉ አክለዋል፡፡
ውሉ የተፈረመው ከየካቲት 1 ቀን 2011 ዓ.ም. ጀምሮ ስለሆነ በዕለቱ እንዳልተዘዋወረ ለቀረበላቸው ጥያቄ ሲመልሱ፣ የአዲሱ ሕንፃ የኤሌክትሪክና የኔትወርክ ዝርጋታ ስላልተጠናቀቀ እስከ የካቲት 15 ቀን 2011 ዓ.ም. ድረስ በነባሩ ሕንፃ ለመቆየት መወሰኑን አስረድተዋል፡፡
Average Rating