Print
Email
0
0
the federal high court
የፌደራል ፍርድ ቤቶች ከመጋቢት 10 ቀን 2012 ዓ.ም ጀምሮ በከፊል ዝግ ያደረጉትን የችሎት ስራ ከሃምሌ 13 ቀን ጀምሮ በየደረጃው መደበኛ ችሎት ሊጀምሩ ነው፡፡
በዚህም ከሃምሌ 13 እስከ ሃምሌ 30 ቀን 2012 ዓ.ም ድረሰ በሁሉም ፍርድ ቤቶች የመልስ መልስ፣ አስተያየቶች፣ የትዕዛዝ ውጤቶችን ለመቀበል የተቀጠሩ እንዲሁም እልባት ለመስጠት ጥቂት ሂደት የቀራቸው ጉዳዮች እና እስረኛ ያላቸው መዛግብት በየቀጠሮ ቀናቸው የማስተናገድ ስራ እንደሚሰራ የፌደራል ፍርድ ቤቶች ቃለ አቀባይ እና የፌደራል የመጀመሪያ ደረጃ ፍርድ ቤት ምክትል ፕሬዚዳንት አቶ ተስፋዬ ነዋይ ለፋና ብሮድካስቲንግ ኮርፖሬት ተናግረዋል፡፡
ከዚህ ባለፈ ግን የሚታዩ ጉዳዮች አስቸኳይነት በዳኛው፣ በፍርድ ቤቱ እንዲሁም በየደረጃው በሚገኝ አመራር አሳማኝነቱ ካልታመነበት ለቀጣዩ አመት የሚቀጠር ይሆናል፡፡
የፌደራል ጠቅላይ ፍርድ ቤት ሰበር ሰሚ ችሎትን በተመለከተ በአዲስ አበባ ከሚገኙ ባለጉዳዮች የሚቀርቡ አቤቱታዎች ይስተናገዳሉም ብለዋል፡፡
በአንጻሩ ከክልል የሚመጡ የሰበር ጉዳዮች የኮቪድ19 ወረርሽኝን መከላከል ሲባል ፍርድ ቤቱ ተለዋጭ የስራ አቅጣጫ በሚሰጥበት ጊዜ ወደፊት እንደሚስተናገዱም አውስተዋል፡፡
በሁሉም ደረጃ ያሉ ፍርድ ቤቶች የሚሰጡ አገልግሎቶች ኪቪድ19ኝን ለመከላከል የወጣውን ደንብ ተከትለው እንደሚሰጡም ጠቁመዋል፡፡
ከዚህ ጋር ተያይዞም ማንኛውም ተገልጋይ የአፍና አፍንጫ መሸፈኛ ጭምብል ካላደረገ ወደ ግቢ መግባት አይፈቀድለትም፡፡
ፍርድ ቤቱም ለአገልግሎቱ በቂ የንጽህና መጠበቂያ ግብአቶችን በማሟላት አገልግሎት እንደሚሰጥም አስረድተዋል፡፡
በተጨማሪም ፍርድ ቤቶቹ አዳዲስ መዝገቦችን ማለትም የቀጥታ ክስ፣ ይግባኝ እና አፈጻጸም መዝገቦችን ደግሞ ከነሐሴ 1 ቀን እስከ ነሐሴ 30 ቀን 2012 ዓ.ም ድረስ ማየት ይጀምራሉ፡፡
ነሐሴ ወር የዳኞች የእረፍት ጊዜ የነበረ ቢሆንም ያሉትን በርካታ መዛግብት ክምችትና ጫናዎችን ለመቀነስ የነሐሴን ወር የሚሰሩ ሲሆን መስከረም ወር 2013 ዓ.ም የዳኞች የእረፍት ጊዜ ይሆናል፡፡
በተረኛ ችሎት ሲስተናገዱ የነበሩ ጉዳዮችም በተረኛ ችሎት እንደሚቀጥሉም ተገልጿል፡፡
Average Rating