በንግድ ሚኒስቴር የገቢና ወጪ እቃዎች ጥራት ቁጥጥር ዳይሬክቶሬት ዳይሬክተር አቶ ታምሩ ገኖ ለሰንደቅ ጋዜጣ እንደገለፁት ከዚህ ቀደም በነበረው አሰራር አንድ አስመጪ የምርቱን የጥራት ደረጃ የሚያስመረምረው ሀገር ውስጥ ገብቶ በጉምሩክ ላብራቶሪዎች አማካኝነት መሆኑን አስታውሰው፤ ቀድሞ የነበረውን አሰራር በመቀየር ከቀጣዩ ሐምሌ ወር 2005 ዓ.ም ጀምሮ ግን አስመጪዎች ሸቀጦቻቸውን ከሚያስመጡባቸው ሀገራት የምርቶቻቸውን ደረጃና ጥራት የሚያረጋግጥ ሰርተፍኬት ከታወቀ ድርጅት ካመጡ እቃዎቻቸው በቀላሉ በጉምሩክ የሚያልፉ መሆኑን ገልፀዋል። ‘‘አስመጪዎች የሦስተኛ ወገን ሰርተፍኬት ካመጡ በሀገር ውስጥ ጉምሩክ የፍተሻ ሂደት የሚወስድባቸውን ጊዜ ስለሚያሳጥሩ መጋዘን ኪራይና ለኢንሹራንስ ከሚያወጡት ወጪ ይድናሉ’’ ያሉት ዳይሬክተሩ ሆኖም የሚቀርበው የጥራት ማረጋገጫ ሰርተፍኬት አለም አቀፍ እውቅና ካለው ላብራቶሪ የተሰጠ መሆን የሚገባው መሆኑን አስታውቀዋል። አለም አቀፍ እውቅና ያላቸው ላብራቶሪዎች ዝርዝር (List) በየጊዜው በኢንተርኔት የሚለቀቅ መሆኑን የገለፁት አቶ ታምሩ፤ አስመጪዎች የሚያቀርቧቸው ሰርተፍኬቶችም ከእነዚሁ አካላት በትክክል የተሰጠ መሆኑ ፍተሻ የሚደረግበት መሆኑን አመልክተዋል።

እስከዛሬ በነበረው የጥራት ፍተሻ አሰራር አንድ በአስገዳጅ ደረጃዎች ሥር ያለ ምርት ሀገር ውስጥ ደርሶ የጉምሩክ የፍተሻ ላብራቶሪን ካላለፈ ወደመጣበት እንዲመለስ ይደረግ የነበረ መሆኑ የተመለከተ ሲሆን፤ ከቀጣይ ሐምሌ ወር ጀምሮ የሚተገበረው አዲስ አሰራር ግን የምርቱን የጥራት ደረጃ ገና ከመነሻው ስለሚወስን ነጋዴውን ከክስረት ያድናል ተብሏል። ከዚህም በተጨማሪ በሀገር ውስጥ ካለው የናሙና መፈተሻ ላብራቶሪ እጥረት ጋር በተያያዘ ሸቀጦች ሀገር ውስጥ ከገቡ በኋላ ፍተሻ እስከሚካሄድባቸው ድረሰ በመጋዘን ስለሚቆዩና የኢንሹራንስ ክፍያም ስለሚጠይቅባቸው አስመጪዎች ለተጨማሪ ወጪ ይዳረጉ የነበረ መሆኑ የተመለከተ ሲሆን በአዲሱ አሰራር መሠረት ግን እቃዎቹን በሰነድ ልውውጥ ብቻ ከጥራት ጋር በተያያዘ የጉምሩክን ኬላ እንዲያልፉ ስለሚደረግ ሸቀጦቹ በመጨረሻ ተጠቃሚው ላይ የሚኖራቸውም የዋጋ ጫና በተወሰነ ደረጃ የሚቀንስበት ሁኔታ ይኖራል ተብሏል። ሚኒስቴር መሥሪያቤቱ በሀገሪቱ ያሉ አስመጪ ነጋዴዎች ከሐምሌ 1 ቀን 2005 ዓ.ም ጀምሮ ተግባራዊ በሚሆነው አዲሱ አሰራር እንዲጠቀሙ በአሁኑ ሰዓት በደብዳቤ በማሳወቅ ላይ ይገኛል።n